EL SUPIAFOJE.

Dirì che noialtri del CHICCHIRICHI' andemo a sercarle tute,col lanternin,quele robe che non va.Ma se non proemo a dir la nostra,chi ghe proa?Stamattina semo in Giarina.Finalmente ancò non piove mia, ma i giardini jè pieni de foie e se sbrissia,dato che jè tuti de piera.Quando riva i spassini.Meno mal,disemo,i spassarà via le foje cascade.Semo lì che guardemo,ma invesse de tor la spassadora i se mette in spale un motorin,collegà a un tubo e i lo impissa."Sa elo quel li?" L'è el SUPIAFOJE!La spassadora moderna. El spassin l'avansa supiando un fotio de aria,e par dir la verità,anca fasendo un gran casin,e manovrando el canoto de goma,el supia tute le foje nei cantoni.El libera praticamente i vialeti dalle foje,muciandole nei cantoni.Belo,ma non ghe fa mia mal la schiena?"Un poco si,sto afar qua el te rompe i reni!"Ghe credo! In ogni modo el spassin el supia da par tuto,dopo el ciapa su e el monta su l'Ape."El scusa capo,ghe disemo,e le foje?"Le foje?Le foje le resta lì !"Come le resta lì,e se vien su el vento,come el veniarà,non el le sparpaja un'altre olta da par tuto?Tuto un lavoro fato par niente,no?"El senta Sior,mi fasso quel che me dise i me capi,non come se dovaria far!El taca l'Ape e el va via.Ecco avio capio?Niente tirar su le foje,bisogna che le staga lì le foje!L'ha dito i Capi !Come se a casa te spasassi nei cantoni le scauje,sensa torle su e metarle nel secio!Ma se le inventeli proprio tute par far girar i cojoni?Sì parchè l'è voler butar via i schei così.Ma tanto paga Pantalon vera?E pò,ghera bisogno del SUPIAFOJE che tra l'altro l'alsa un spolvaron che non finisse più?Certamente!Una spassadora la costa un EURO,el SUPIAFOJE minimo dosento,sensa contar la bensina e la manutension.Fato sta che semo restà li,come bauchi,sensa saver sa dir.Almanco i tirasse su le scauje,machè i le lassa lì!Ma ci è che comanda i laori,una banda de mati?Ma non savemo più sa dir. A la prossima!

EL SCALIN DE PIASSA ISOLO !

ECO!SIO CONTENTI ADESSO?Adesso el scalin l'è roto.L'è sta par dei mesi in pingolon!L'è mesi che emo scrito in Comune,al Sportel del citadin.Jè mesi che i stradini i lo vedea.Ma se sa,roba de tuti roba de nissun! COMUNE,SINDACO,ASESSORI,non stasì mia vegnar a dirme che non ghè schei!Vedo che par i monumenti in BRA' i schei i ghè!Na cazolada de malta ghe volea e basta!Adesso bisogna cambiar el scalin ,figuremose.E star atenti anca che qualcheduno,qualche boceta non se rompa l'osso del col!El scalin de Piassa Isolo el mandava el comune in malora,vera?Ma se sa,noialtri de Piassa Isolo.semo mia come quei de la BRA'.Noialtri semo i fioi de la serva,i fioi de la galina mora,era?Fasì veniar angossa GENTE DE COMUNE.Mai che vegnì a vedar quel che non va,anca se i ve le dise,i ve lo scrive!Rompemo i cojoni noialtri del CHICCHIRICHI' era?E seitaremo!Paghemo come quei altri savio?Sarà anca ora de Elessioni tra poco.Vegnì,vegnì a domandar el voto.Ma non ve vergognio?Ci elo quel che gà in man i giardini e la piassa!Un serto PISA i ma dito,se non me sbaglio.Elo parchè non l'è mia la tore de Pisa,el scalin de Piassa Isolo,che non si vegnudi fora a giustar?Ghè un'altra piera in pingolon,de fronte al Centro JORIO e VOLINO.Spetemo che la se rompa anca quela lì?E, el tombin dei COLLEGAMENTI ELETTRICI,le verto da quando ghè sta la festa in piassa s'istà.Spetemo che qualcheduno se frisa,che el resta tacado via da la corente elettrica?Guardì che semo stufi de sitar a romparse par i laori che non va.Si voialtri incaricadi dei laori de controllo,si voialtri che a fine mese ciapì i schei.Si boni solo de far far i laori grossi vera?Come mai queli si e quei picenini no!Ghe poco da rocar forse con un scalin solo?Oh butei del COMUNE dasive da far,non gavio mia rossor a vedar ste robe,a sentir ste robe?CHICCHIRICHI' VIGILA e ve romparà i cojoni,stasì pur sicuri!