LA PERGOLA DE SANTA MARIA IN ORGANO.

Dentro la cortesela de la canonica de Santa Maria in Organo,ghera una pergola.La fasea un'ua moscata che l'era na delissia.L'era lì da sempre,el l'avea conossuda anca me nono!Noialtri da bocie,dato che lì ghera el patronato,la tenieino sempre d'ocio quando l'era ora.Anca el PRETE però.Nol volea mia che ghe ne ciavassimo nianca un graspo.Ma sa,non el podea miga essar sempre lì el prete e appena el girava l'ocio,sù par le inferiate delle finestre della scola,a ciavar graspi!L'era bela la pergola.La gavea tre grossi tronchi che venia su da cissà dove,par dopo coersar tutto el cortil!Se podea star a l'ombra tutta l'istà a sugar a ping-pong,sensa ciapar solane.L'ultimo a teniar la pergola,l'è stà Don Mario,fin a pochi ani fa.Morto don Mario,morta la pergola.Ma no parchè la se sia sa secà,parchè i l'ha tajà.La ghe stava sui cojoni la pergola al novo Parroco.Cissà parchè.E i ghe l'ha lassar far.Adesso che bruto quel cortil lì.Resta solo le inferiade imberlà da noialtri alle finestre della scola.Ma non le mia finì li!Più in là,al fianco destro de la ciesa,ghè un altro cortil.El gavea figari e un'altra pergola tacà el muro.Ma i gavea da far i laori,par far la ciesa più bela ciò.Sa vio sa jà fato?Via la pergola e via i figari.I figari non i rompeva mia le bale par i laori,ma a qualchedun si!Eco,andà via anca quel prete,lì e un'altro ancora.Adesso ghe n'è uno novo,i m'ha dito.Vedaremo sa el fa tajar quel lì.Forse l'olivara che ghè dentro la cancelada de destra?Forse el cipresso che è restà?Le mejo che el se taja qualcossa d'altro se anca sto qua el gà quele bele idee li.Ognuno che vien taja. E la ciesa le sempre più sola.Son restà mi e CHICCHIRICHI' a guardar la ciesa monca del so verde,de la so ua e dei so figari.Ma nissun la dito niente.Ma ormai non ghè nissun dei veci,de quei che ha robà ua e fighi, da mostri.Sa volio che ghe interessa a quei quatro foresti che va ancora in ciesa.Domandighe a quei che non sta più in sona,a quei de la me età e che sei se ricorda de la PERGOLA DE SANTA MARIA.Ma adesso jè tuti ecologisti! Si da carega!